Surat : શહેરના સિટીલાઈટના સૂર્યપ્રકાશ રેસિડેન્સી કેમ્પસમાં અજાણ્યા વાહનચાલકની અડફેટે સાડાત્રણ વર્ષનું બાળક માસુમ કચડાઈ જતા બાળકનું મોત થતા પરિવારજનોમાં શોક છવાયો હતો. તો આ મામલે તાત્કાલિક ઉમરા પોલીસે આ બાબતે અકસ્માતે મોતનો ગુનો નોંધી તપાસ શરૂ કરી છે.
સુરતના પીપલોદ વિસ્તારમાં ગુરુવારની મોડી સાંજે બનેલી ઘટનામાં એક સાડા ત્રણ વર્ષનું બાળક પોતાના ઘર નીચે રમી રહ્યો હતો. તે દરમિયાન કોઈ અજાણ્યા કાર ચાલક દ્વારા અડફેટમાં લેતા બાળકને ઈજા થઈ હતી. જેથી બાળકને તાત્કાલિક સોસાયટીના લોકો હોસ્પિટલ લઈ ગયા હતા. પણ બાળકનું સારવાર દરમિયાન મોત થયું, બાદમાં ઉમરા પોલીસને જાણ થતાં પોલીસની ટીમ ઘટના સ્થળે પહોંચી હતી અને તપાસ શરૂ કરી હતી.
માસુમના મૃતદેહને જોઈ પરિવાર શોકમાં ગરકાવ થઈ ગયો હતો. પણ બાળકના મોત બાદ પણ પરિવાર દ્વારા એની આંખ કોઈનામાં જીવિત રહેશે તો તે દુનિયા જોઈ શકશે. જે સમજીને સાડાત્રણ વર્ષના બાળકની આંખોને ડોનેટ કરી છે. અને, મૃતક બાળકની આંખો લોક દૃષ્ટિ ચક્ષુ બેંકે સ્વિકારી હતી. બાળકની દાનમાં મળેલી આંખો કોઈ બે વ્યક્તિની અંધારી દુનિયાને રંગીન જરૂર કરશે. હાલ તો ઉમરા પોલીસે આજુબાજુના સીસીટીવીને આધારે શોધખોળ કરી કાર ચાલકને પકડવા તપાસ કરવામાં આવી રહી છે.
શું છે સમગ્ર ઘટના ?
માસુમ ફ્લેટના કંપાઉન્ડમાં બાળમિત્રો સાથે રમી રહ્યો હતો. ત્યાર બાદ એક સફેદ કલરની કાર માસુમને કચડીને ફરાર થઇ હતી. આજુબાજુના લોકો માસુમને લોહીના ખાબોચિયામાં જોઈને ગભરાઇ ગયા હતાં. આ અંગે તાત્કાલિક જાણ થતા માસુમનો આખો પરિવાર દોડીને કેમ્પસમાં દોડી આવ્યો હતો. ઇજાગ્રસ્ત હાલતમાં માસુમ પુત્રને જોઈ પરિવારની હાલત ખરાબ થઇ ગઇ હતી. માસુમને માથાના ભાગે ગંભીર ઇજા થવાથી તબીબોએ તેને મૃત જાહેર કરતાં જૈન પરિવાર ધ્રુસકે ધ્રુસકે રડી પડ્યો હતો.
બાળકોની આંખોનું દાન ઘણા ઓછા કેસમાં જોવા મળે છે
સુરતમાં આ પ્રથમ કિસ્સો નોંધાયો છેકે જેમાં માસુમની આંખોનું દાન કરવામાં આવ્યું હોય. આ અગાઉ 5 વર્ષના બાળકની આંખો ડોનેટ કરાઈ હોવાનું સામે આવ્યું છે. મોટાભાગના કેસમાં 65 ટકા આંખનું ડોનેટ સિનિયર સિટિઝન કરતા હોય છે. જોકે, સિનિયર સિટીઝનની આંખોનો ઉપયોગ બહુ ઓછો થાય છે. ત્યારે સુરતમાં માત્ર સાડા 3 વર્ષના બાળકની બંને આંખોનું દાન ઉદાહરણરૂપ કિસ્સો છે.
03-Dec-2024