હોસ્પિટલોમાં સ્ટાફની તંગી સર્જાતા ક્વોરન્ટાઇનનો સમય ઘટાડવામાં આવ્યો
જર્મનીમાં ઓમિક્રોનના કેસો વધવાની આરોગ્ય પ્રધાને ચેતવણી આપી : બેથલેહેમમાં સતત બીજા વર્ષે નાતાલની ઉજવણી ફિક્કી
લંડન : ઓમિક્રોન વેરિઅન્ટે દુનિયાભરમાં દહેશતનો માહોલ સર્જ્યો છે. યુકે, યુએસ અને યુરોપમાં ઓમિક્રોનના નવા કેસોની સાથે હવે મરણાંક પણ વધવાને કારણે વિવિધ દેશોમાં આકરાં નિયંત્રણો લાદવામાં આવી રહ્યા છે.
યુએસમાં આરોગ્ય કર્મચારીઓની હાલત એટલી બધી કફોડી થઇ છે કે સીડીસીએ નિર્ણય લેવો પડયો છે કે કોરોના પોઝિટિવ આરોગ્ય કર્મચારી ટેસ્ટ નેગેટિવ આવ્યા બાદ હવે દસને બદલે સાત દિવસ હોમ ક્વોરન્ટાઇન રહ્યા બાદ પાછો કામે ચડી શકે છે. અમેરિકામાં કોરોનાના નવા 2.67 લાખ કેસ નોંધાયા છે જ્યારે વધુ 1,149ના મોત થયા હતા.
આ સાથે કુલ કેસ 5.27 કરોડ અને મૃત્યુઆંક 8.34 લાખથી વધુ થયો છે. બ્રિટનમાં નવા 1.22 લાખ કેસ અને વધુ 137ના મોત થયા હતા આ સાથે કુલ કેસ 1.18 કરોડ જ્યારે મૃત્યુઆંક 1.47 થયો હતો. બીજી તરફ ઓસ્ટ્રેલિયામાં ચાર જાન્યુઆરીથી 18 વર્ષની ઉંમરના વ્યક્તિએ ચાર મહિના પૂર્વે પહેલી રસી મુકાવી હોય તો તે પણ બૂસ્ટર શોટ મેળવી શકશે.
દરમ્યાન ઉડ્ડયન ક્ષેત્રમાંં ફલાઇટ ક્રૂ ઓમિક્રોનના ચેપનો ભોગ બનવાને પગલે વ્યસ્ત પ્રવાસન મોસમમાં દુનિયાની ત્રણ અગ્રણી એરલાઇન્સે નાતાલ દરમ્યાન સેંકડો ફલાઇટ રદ કરવાની જાહેરાત કરી છે. જર્મનીની લુફતહંસાએ તેમના વિમાનચાલકો મોટાપાયે માંદા પડી જવાને પગલે હ્યુસ્ટન, બોસ્ટન અને વોશિંગ્ટનની એક ડઝન ફલાઇટો રદ કરવાની જાહેરાત કરી હતી.
કોલંબિયા યુનિવર્સિટી અને હોંગકોંગ યુનિવર્સિટીના સંશોધકોએ જણાવ્યું હતું કે જેમણે મોડર્ના, ફાઇઝર, એસ્ટ્રાઝેનેકા અને જ્હોન્સન એન્ડ જ્હોન્સનની રસીના બે ડોઝ લીધા હોય તેમના કિસ્સામાં પણ રસી ઓછી અસરકારક જણાઇ છે. દરમ્યાન જર્મનીમાં બુધવારે ઓમિક્રોનના 3198 કેસો નોંધાવાને પગલે હવે મરણાંક વધવાની સંભાવના વધી રહી છે.
જર્મનીના આરોગ્ય પ્રધાન કાર્લ લોઉટરબાકે ચેતવણી આપી હતી કે આગામી દિવસોમાં ઓમિક્રોનના કેસોમાં મોટો વધારો થઇ શકે છે. ઇસુના જન્મસ્થાન બેથલેહેમમાં પણ સતત બીજે વર્ષે નાતાલની ઉજવણી કોરોના મહામારીને કારણે ફિકી પડી ગઇ હતી. ઇઝરાયલે તમામ એર ટ્રાફિક પર પ્રતિબંધ મુકી દીધો હોઇ સતત બીજે વર્ષે ઇન્ટરનેશનલ ટુરિસ્ટ બેથલેહેમમાં નાતાલ મનાવવા માટે આવ્યા નથી.
05-Mar-2025