રાજ્યભરમાં ભારેથી અતિભારે વરસાદની સ્થિતિ છે. પાટણના સાંતલપુરમાં સૌથી વધુ ૬-૫ ઇંચ વરસાદ. ગુજરાતમાં છેલ્લા ૧૨ કલાકમાં ૨૩૧ તાલુકામાં વરસાદ થયો છે.
રાજ્યમાં હાલ એક સાથે ત્રણ વરસાદી સિસ્ટમ સક્રિય
અમદાવાદ । રાજ્યભરમાં ભારેથી અતિભારે વરસાદની સ્થિતિ છે. હાલ વરસાદે રાજ્યભરમાં જમાવટ કરી છે. રાજ્યમાં હાલ એક સાથે ત્રણ વરસાદી સિસ્ટમ સક્રિય છે. જેના પગલે સતત ગુજરાતમાં સામાન્યથી ભારે વરસાદ પડી રહ્યો છે. તાજેતરના હવામાન વિભાગે હજું આગામી ૨૪ કલાક ગુજરાતમાં વરસાદની આગાહી કરી છે.
ગુજરાતમાં અનરાધાર વરસાદની આગાહી વચ્ચે છેલ્લા ૧૨ કલાકમાં ૨૩૧ તાલુકામાં નોંધપાત્ર વરસાદ વરસ્યો છે. જેમાં સૌથી વધુ પાટણના સાંતલપુરમાં સૌથી વધુ ૬-૫ ઇંચ વરસાદ, રાજકોટના કોટડા સાંગાણીમાં છ ઇંચ વરસાદ ખાબકયો છે, જ્યારે કચ્છના અબડાસમા પાંચ ઈંચ વરસાદ, દ્વારકાના ખંભાળિયામાં
પણ દે ધનાધન પાંચ ઈંચ વરસાદ, રાજકોટના ઉપલેટામાં પણ પાંચ ઈંચ, જુનાગઢના વંથલીમાં ચાર ઇંચ વરસાદ, રાજકોટના ગોંડલમાં ૩.૫ ઇંચ વરસાદ નોંધાયો છે. સવારથી જ પાટણ વિસ્તારમાં મેઘમહેર જોવા મળી રહી છે. પાટણના સાંતલપુરમાં સ્થિતિ વધુ ખરાબ જોવા મળી રહી છે. સાંતલપુર તાલુકામાં વહેલી સવારથી મેઘમહેર થતા જળબંબાકારની સ્થિતિ જોવા મળી રહી છે. સમગ્ર તાલુકામાં સાર્વત્રિક વરસાદ પડી રહ્યો છે. સાંતલપુરમાં છેલ્લા દ કલાકમાં ૬ ઈંચ વરસાદ ખાબકતા જ્યા જુઓ ત્યા પાણી જ પાણી જોવા મળી રહ્યું છે. જો હજુ લાંબો સમય વરસાદ યથાવત રહેશે તો સ્થિતિ વણસી શકે છે. ભારે વરસાદથી નીચાળા વિસ્તારમાં પાણી ભરાયા છે. વારાહી પંથકમાં નીચાળા વિસ્તારમાં પાણી ભરાયા છે. વારાહીના કાદીસરા તળાવ વિસ્તારમાં પાણી ભરાયા છે. તળાવનું પાણી બેક મારતા લોકોના ઘરો સુધી પાણી પહોચ્યું છે. હજુ પણ ધીમીધારે અવિરત વરસાદ યથાવત છે. રાજકોટ શહેરના અલગ અલગ વિસ્તારોમાં વરસાદ પડ્યો છે. સવારથી લઈને અત્યાર સુધીમાં એકથી દોઢ ઇંચ જેટલો વરસાદ પડ્યો છે. હજી પણ રાત સુધીમાં ભારે વરસાદ પડે તેવું વાતાવરણ જોવા મળી રહ્યું છે. તો બીજી તરફ જિલ્લામાં સૌથી વધુ ગોંડલ તાલુકામાં ત્રણ ઈંચ જેટલો વરસાદ પડ્યો છે. ગોંડલ તાલુકાના અનેક ગામડાઓમાં ધોધમાર વરસાદ પડ્યો છે. તો ગોંડલ શહેરના અલગ અલગ વિસ્તારોમાં પણ પાણી ભરાયા છે. લોકોને અવર જવર કરવામાં મુશ્કેલીનો સામનો કરવો પડી રહ્યો છે.
25-Jun-2025