દિલ્હીમાં મોટો ધડાકો : લાલ કિલ્લા મેટ્રો સ્ટેશનના ગેટ નંબર-૧ નજીક કારમાં વિસ્ફોટ : ૩-૪ અન્ય વાહનો પણ લપેટમાં, દહેશતનો માહોલ : જૂની દિલ્હીમાં મેટ્રો સ્ટેશન નજીક બ્લાસ્ટની ઘટના : દેશમાં મોટા આતંકી હુમલાનું કાવતરું ઘડતા મોડયુલો પર કાર્યવાહીના દિવસે જ વિસ્ફોટથી ખળભળાટ : ફાયર વિભાગે તપાસ હાથ ધરી : સત્તાવાર વધુ વિગતોની રાહ જોવાય છે.:
સોમવારે લાલ કિલ્લા મેટ્રો સ્ટેશન નજીક એક કાર વિસ્ફોટમાં ઓછામાં ઓછા આઠ લોકોના મોત થયા હતા. વિસ્ફોટને કારણે આગ પણ લાગી હતી જેના કારણે નજીકના ત્રણથી ચાર વાહનોને નુકસાન થયું હતું.
દિલ્હી ફાયર વિભાગે ન્યૂઝ એજન્સી ANI ને જણાવ્યું કે, આ ઘટના સ્ટેશનના ગેટ નંબર 1 પાસે બની હતી. લોકનાયક જય પ્રકાશ નારાયણ (LNJP) હોસ્પિટલના મેડિકલ સુપરિન્ટેન્ડેન્ટે ANI ને જણાવ્યું કે, "આઠ લોકો હોસ્પિટલ પહોંચતા પહેલા જ મૃત્યુ પામ્યા હતા. ત્રણ ગંભીર રીતે ઘાયલ છે. એકની હાલત સ્થિર છે."
વિસ્ફોટ પછી, રાજધાનીમાં હાઇ એલર્ટ જાહેર કરવામાં આવ્યું છે. સમાચાર એજન્સી પીટીઆઈના અહેવાલ મુજબ, વિસ્ફોટમાં ઘાયલોની આશંકા છે. સૂત્રોએ ANIને જણાવ્યું હતું કે, ઘાયલોને, જેમાં સંખ્યાબંધ લોકો હતા, તેમને LNJP હોસ્પિટલમાં ખસેડવામાં આવ્યા હતા.
કુલ 7 ફાયર ટેન્ડર ઘટનાસ્થળે પહોંચી ગયા છે. દિલ્હી પોલીસ સ્પેશિયલ સેલની એક ટીમ પણ ઘટનાસ્થળે પહોંચી ગઈ છે. વિસ્ફોટ પાછળનું કારણ હજુ સુધી જાણી શકાયું નથી.
આટલો જોરદાર વિસ્ફોટ ક્યારેય સાંભળ્યો નથી,' પ્રત્યક્ષદર્શીએ કહ્યું.
"મેં મારા ઘરમાંથી આગની જ્વાળાઓ જોઈ અને પછી શું થયું તે જોવા માટે નીચે આવ્યો. એક જોરદાર વિસ્ફોટ થયો. હું નજીકમાં રહું છું," સ્થાનિક રહેવાસી રાજધર પાંડેએ સમાચાર એજન્સી ANI ને જણાવ્યું.
"મેં મારા જીવનમાં ક્યારેય આટલો જોરદાર વિસ્ફોટ સાંભળ્યો નથી. વિસ્ફોટને કારણે હું ત્રણ વખત પડી ગયો. એવું લાગ્યું કે આપણે બધા મરી જઈશું..." એક સ્થાનિક દુકાનદારે કહ્યું.બીજા એક સાક્ષીએ કહ્યું: "જ્યારે અમે નજીક આવ્યા, ત્યારે અમે રસ્તા પર શરીરના ટુકડાઓ ફેલાયેલા જોયા. કોઈ સમજી શક્યું નહીં કે શું થયું. ઘણી કારને નુકસાન થયું છે". તેમણે આગળ કહ્યું: "જ્યારે અમે રસ્તા પર કોઈનો હાથ જોયો, ત્યારે અમે એકદમ ચોંકી ગયા. હું તેને શબ્દોમાં સમજાવી શકતો નથી."
સમાચારો હજુ અપડેટ થઈ રહ્યા છે.
13-Nov-2025